Pas 11 ditësh bllokim për shkak të rrëshqitjes masive të dherave dhe dëmtimit të urës në zonën “Arrat e Gurrës”, është rikthyer qarkullimi i automjeteve në aksin kombëtar Librazhd–Përrenjas. Segmenti u hap sot në mesditë përmes një devijimi provizor të ndërtuar pranë pozicionit ekzistues, që do të shërbejë si zgjidhje e përkohshme deri në ndërtimin e rrugës alternative në shtratin e lumit Shkumbin. Qarkullimi është i mundur për të gjitha mjetet, përfshirë ato me tonazh të rëndë, me kufizim ngarkese 8.2 ton për aks, dhe segmenti do të funksionojë me sinjalistikë kantieri dhe do të jetë i paasfaltuar deri në stabilizimin e shtresave mbajtëse. Autoritetet kërkojnë mirëkuptimin e përdoruesve të rrugës dhe banorëve të zonës, duke u bërë thirrje për respektimin e sinjalistikës dhe udhëzimeve të Policisë Rrugore për një qarkullim të sigurt.