Qarkullimi në pikëkalimin kufitar Hani i Elezit – Bllacë, që lidh Kosovën me Maqedoninë e Veriut, u ndal përkohësisht për shkak të një problemi në sistemin e regjistrimit të hyrje/daljeve në Maqedoni. Policia maqedonase ndërpreu kalimin e personave dhe automjeteve, duke shkaktuar kolona të gjata dhe vonesa në pikëkalim. Pas ndërhyrjes dhe rregullimit të sistemit nga autoritetet e Maqedonisë së Veriut, qarkullimi u rifillua në orën 14:15, duke lejuar kalimin sipas sistemit hyrje/hyrje. Qendra Kombëtare për Menaxhim Kufitar të Kosovës njoftoi për situatën dhe për rifillimin normal të qarkullimit në këtë pikëkalim.