Komuna e Prishtinës ka njoftuar rikthimin e skemës së mëparshme të qarkullimit në lagjen Lakrishtë, pas përfundimit të punimeve infrastrukturore në zonë. Rrugët “Hekurudha” dhe “Vicianum” do të funksionojnë me një kah qarkullimi, duke filluar nga kryqëzimet përkatëse, ndërsa rrugët “Bekim Fehmiu” dhe “Tirana” mbeten me dy kahje. Ky riorganizim synon përmirësimin e rrjedhës së trafikut dhe rritjen e sigurisë në komunikacion në këtë pjesë të qytetit. Komuna apelon tek qytetarët që të respektojnë sinjalistikën dhe të tregojnë kujdes gjatë qarkullimit në rrugët e rikthyera.