Ministria e Punëve të Brendshme e Maqedonisë po përgatit ndryshime ligjore për të rregulluar përdorimin e trotinetëve elektrikë, me qëllim rritjen e sigurisë në komunikacion. Ministri Pançe Toshkovski njoftoi se do të ashpërsohet politika ndëshkuese, veçanërisht për të rinjtë, duke rritur edhe kufirin e moshës për përdorimin e tyre. Analizat tregojnë se aksidentet me trotinetë janë më të shpeshta tek personat deri në 17-18 vjeç, ndërsa ngasja në grupe dhe pa pajisje mbrojtëse shkakton pasoja serioze. Përveç kësaj, po trajtohet edhe problemi i kalimeve të paligjshme në zonën e Bit Pazarit, ku priten masa konkrete në bashkëpunim me Qytetin e Shkupit.