Kuvendi i Maqedonisë së Veriut miratoi Ligjin e ri për lojërat e fatit me 60 vota "pro" dhe 20 "kundër", duke vendosur masa të reja për rregullimin e këtij sektori. Ligji përcakton distancën minimale prej 500 metrash midis objekteve të lojërave të fatit dhe shkollave fillore e të mesme, si dhe kufizon ndjeshëm reklamimin e kazinove, duke lejuar vetëm tabela të vogla pa mesazhe promovuese. Një tjetër ndryshim i rëndësishëm është lidhja e detyrueshme GPS e pajisjeve të lojërave me Drejtorinë e të Ardhurave Publike për mbikëqyrje më të mirë dhe luftë kundër organizatorëve të palicencuar. Ligji është në përputhje me rekomandimet ndërkombëtare për parandalimin e pastrimit të parave dhe financimit të terrorizmit, ndërsa Ministria e Financave do të propozojë ndryshime shtesë nëse identifikohen dobësi gjatë zbatimit.