Komuna e Prishtinës ka propozuar ndryshime të rëndësishme në rregulloren për organizimin dhe shfrytëzimin e parkingjeve, të cilat janë në konsultim publik deri më 24 shtator 2026. Një nga ndryshimet kryesore është se bllokimi dhe zhvendosja e automjeteve, përfshirë shërbimin e “merimangës”, do të bëhet vetëm me urdhër të Drejtorisë së Inspeksionit Komunal, ndërsa “Prishtina Parking” do të ketë vetëm rol mbështetës teknik dhe logjistik. Pagesa e parkingut do të ofrohet në mënyra të ndryshme, duke përfshirë aplikacionet mobile, kartelat bankare dhe pagesën me para të gatshme, me detyrimin që në çdo zonë të ketë së paku dy mënyra funksionale pagese. Gjithashtu, rregullorja parashikon gjoba nga 30 deri në 100 euro për shkeljet e ndryshme të parkimit, ndërsa operatorët privatë të parkingjeve pa leje mund të gjobiten deri në 1,000 euro dhe në rast përsëritjeje mund të urdhërohet mbyllja e parkingut.