Ministri në detyrë i Infrastrukturës dhe Transportit, Dimal Basha, ka njoftuar për përfundimin e punimeve për sanimin e rrëshqitjes së dheut në Carralevë, e cila kishte rrezikuar seriozisht trupin e rrugës dhe sigurinë e përdoruesve. Ai ishte i pranishëm në përfundimin e punimeve së bashku me kryetarin e Komunës së Shtimes, Qemajl Aliun, dhe theksoi se intervenimi u bë menjëherë pas marrjes së detyrës, duke e trajtuar këtë çështje si prioritet. Procedurat u përshpejtuan në koordinim me administratën lokale dhe sanimi u realizua në kohë rekord, duke rikthyer funksionalitetin dhe sigurinë e plotë të rrugës. Ministri Basha u shpreh se rruga tani është plotësisht e qarkullueshme dhe premtoi vazhdimësi në punë të mira për mirëmbajtjen e infrastrukturës rrugore.