Gjatë javës së fundit në Maqedoni janë regjistruar shtatë raste të reja me infeksion nga virusi i Nilit Perëndimor, të gjitha në Shkup, në disa komuna të ndryshme. Personat e prekur janë kryesisht të moshës së tretë, nga 60 deri në 84 vjeç, dhe të gjithë janë hospitalizuar në Klinikën Universitare për Sëmundje Infektive dhe Gjendje Febrile, ku aktualisht ndodhen 16 pacientë, prej të cilëve tre janë në gjendje kritike dhe të intubuar. Deri tani, në vend janë regjistruar gjithsej 20 raste që nga maji, ndërsa autoritetet shëndetësore theksojnë rëndësinë e masave parandaluese si përdorimi i repelentëve, shmangia e qëndrimit në ambiente të hapura në orët kur mushkonjat janë më aktive, dhe largimi i ujërave të ndenjura që favorizojnë shumimin e mushkonjave. Ministria e Shëndetësisë apelon për kujdes dhe ndërgjegjësim për të parandaluar përhapjen e mëtejshme të virusit.