Një segment prej rreth një kilometri i magjistrales së vjetër në dalje të Vushtrrisë, i dëmtuar që nga maji i vitit 2024, vazhdon të jetë i pa shtruar dhe me shumë gropa, duke vështirësuar qarkullimin e automjeteve. Shoferët shpesh detyrohen të vozisin në shiritin e kundërt ose në skajet e rrugës për të shmangur dëmtimet, ndërsa gjendja e rrugës vetëm sa është përkeqësuar. Kryetari i Vushtrrisë, Ferit Idrizi, ka deklaruar se rruga është përgjegjësi e Ministrisë së Infrastrukturës, por komuna nuk ka marrë ende përgjigje për kërkesën zyrtare që kjo rrugë të kalojë nën përgjegjësinë e komunës. Ministria dhe ministri i ri i Infrastrukturës nuk kanë dhënë asnjë përgjigje lidhur me gjendjen dhe planet për riparimin e këtij segmenti rrugor.