Bujar Osmani, nënkryetar i Bashkimit Demokratik për Integrim, po zhvillon një vizitë dyditore në Bruksel ku ka takuar përfaqësues të lartë të institucioneve evropiane dhe eurodeputetë. Gjatë këtyre takimeve, ai ka ngritur shqetësime serioze për cenimin dhe zhbërjen e Marrëveshjes së Ohrit, e cila është themeli i bashkëjetesës dhe stabilitetit ndëretnik në Maqedoninë e Veriut. Osmani ka paralajmëruar për një plan të organizuar që po rrënon shtyllat kryesore të marrëveshjes, duke krijuar një vakum dhe paparashikueshmëri që mund të keqpërdoret nga palë të treta. Ai ka theksuar gjithashtu nevojën urgjente për tejkalimin e bllokadës në procesin e integrimit evropian, duke kërkuar vendime të guximshme brenda vendit dhe angazhim të vazhdueshëm nga partnerët evropianë.