Autoritetet lokale në Tetovë kanë nisur me vetëfinancim hapjen e trasesë së parë të rrugës që do të lidhë Tetovën me Prizrenin, duke përfshirë kilometrat e parë drejt vendit ku do të ndërtohet tuneli ndërkufitar. Ky projekt infrastrukturor, me një kosto fillestare prej 250 mijë eurosh, po zhvillohet me ritme intensive dhe synon të krijojë një korridor të ri tregtar dhe ekonomik mes dy shteteve. Pas përfundimit të fazës së parë, autoritetet lokale do të kërkojnë mbështetjen e qeverisë së Maqedonisë së Veriut për asfaltimin dhe ndërtimin e tunelit, për të cilin së shpejti pritet të hapet tenderimi për projektimin. Në takimin e fundit mes zëvendësministrave të Transportit të Maqedonisë së Veriut dhe Kosovës u konfirmua koordinimi i dy qeverive për pjesën ndërkufitare, duke u fokusuar në financimin dhe realizimin e projektit.