Kryetari i Komunës së Rahovecit, Smajl Latifi, ka kërkuar ndërhyrje urgjente për riparimin e rrugëve rajonale Kramovik-Xërxë dhe Rahovec-Krushë e Madhe, të cilat janë në gjendje të rënduar me dëmtime dhe gropa të shumta. Ai ka theksuar se këto segmente rrugore janë ndër më të frekuentuarat në komunë dhe gjendja e tyre po rrezikon sigurinë e qytetarëve çdo ditë. Latifi i është drejtuar Ministrisë së Infrastrukturës dhe Transportit me kërkesë për rehabilitim të menjëhershëm, duke kërkuar që kjo çështje të trajtohet me prioritet dhe të ndiqet me veprime konkrete. Ai ka nënvizuar se kjo ka qenë një kërkesë e vazhdueshme e komunës dhe se qytetarët meritojnë rrugë më të sigurta për qarkullim.