Policia e Trafikut të Ohrit ka nisur sot zbatimin e sistemit modern të mbikëqyrjes së trafikut "Safe City" në rrethinën e SPB-së së qytetit, pas një periudhe testimi dhe inspektimi teknik. Kamerat e sigurisë u vunë në funksion fillimisht në autostradën pranë Novo Sellës, Komuna Debërcë, ndërsa në ditët në vijim pritet të përfshihen edhe rrugë të tjera të rëndësishme si korridoret 8 dhe 10 dhe segmenti midis fshatrave Gorenci dhe Trebenishtë. Ky sistem synon të përmirësojë kontrollin e trafikut, të ulë aksidentet rrugore dhe të rrisë disiplinën dhe sigurinë në rrugë, duke zbuluar shkeljet e rregullave. Policia u bën apel shoferëve të respektojnë rregullat, veçanërisht limitin e shpejtësisë prej 100 km/orë në këtë pjesë të autostradës.