Presidenti i Serbisë, Aleksandar Vuçiq, njoftoi se vendi do të rrisë numrin e raketave kineze CM-400 dhe do të blejë avionë ushtarakë të rinj, duke theksuar se pilotët tashmë po trajnohen për përdorimin e avionëve francezë Rafale. Këto deklarata u bënë gjatë një stërvitjeje ushtarake të organizuar më 28 qershor në Batajnicë dhe Pasulanske Livade, ku u demonstruan aftësitë e njësive të ndryshme ushtarake dhe u ekspozuan armatimet e reja. Pavarësisht paralajmërimeve nga Brukseli dhe Uashingtoni, Serbia ka thelluar bashkëpunimin ushtarak me Kinën, duke importuar më shumë se gjysmën e armëve nga Kina në periudhën 2020–2024. Vuçiq theksoi se Serbia do të ruajë politikën e neutralitetit ushtarak dhe do të vazhdojë stërvitjet me të gjitha palët, duke shmangur përfshirjen në konfliktet rajonale.