Më 18 korrik, lëvizja nacionaliste serbe "Zemra e Heronjve" bëri thirrje publike për arrestimin e ish-pjesëtarëve të Ushtrisë Çlirimtare të Kosovës, duke publikuar lista me emra dhe të dhëna personale të tyre. Kjo organizatë kërkon nga Prokuroria për Krime Lufte në Beograd dhe autoritetet policore të vendeve të Bashkimit Evropian që të ndërmarrin masa ndaj personave të përfshirë, duke e cilësuar këtë si një strategji të organizuar kundër Kosovës. Reagimet nuk vonuan; kryetari i Organizatës së Veteranëve të UÇK-së, Hysni Gucati, u bëri thirrje bashkëluftëtarëve të mos kalojnë në territorin e Serbisë për shkak të rrezikut nga arrestimet. Instituti “Octopus” e konsideron këtë veprim si një kundërpërgjigje të Serbisë ndaj hetimeve për krimet e luftës që po zhvillohen në Kosovë, duke përdorur akuza të pabaza dhe lista të ish-ushtarëve të UÇK-së për të justifikuar veprime shtetërore represive. Ndërkohë, autoritetet serbe vazhdojnë ndalimet në pikat kufitare, si rasti i Osman Selmanit, i cili u arrestua më 1 korrik nën dyshimin për krime lufte dhe ndodhet në paraburgim.