Në vitin 2025, autoritetet serbe mohuan të paktën 110 raste të krimeve të luftës dhe kundër njerëzimit nga luftërat e viteve ’90, duke përfshirë masakrën e Reçakut, varrezat masive në Batajnicë dhe gjenocidin në Srebrenicë. Raporti i Nismës së të Rinjve për të Drejtat e Njeriut evidenton gjithashtu 60 raste glorifikimi të kriminelëve të dënuar të luftës dhe 50 forma të ndryshme mohimi, përfshirë edhe mohimin e ekzistencës së kampeve në Bosnjë. Një ngjarje domethënëse e vitit ishte varrimi me ceremoni shtetërore i Nebojsha Pavkoviqit, gjeneralit të dënuar për krime lufte, duke e bërë atë kriminelin e parë të luftërave të viteve ’90 që nderohet publikisht në Serbi. Drejtoresha e YIHR, Sofija Todoroviq, thekson se mohimi dhe relativizimi i krimeve janë bërë shtylla kryesore të politikës serbe, duke dobësuar kapacitetet demokratike dhe duke përdorur këto tema për diskreditimin e kundërshtarëve politikë.