Kryeministri Edi Rama mori pjesë si i ftuar nderi në Konferencën Vjetore të Komisionit të Bllokut Lindor në Berlin, ku u diskutuan sfidat e mëdha që përballen Europa dhe Ballkani Perëndimor. Rama theksoi se kontinenti po përballet me ndryshime gjeopolitike të thella, duke përfshirë rikthimin e luftës dhe konkurrencën strategjike globale, si dhe transformimin teknologjik që po ndryshon ekonomitë dhe shoqëritë. Një shqetësim i veçantë u përqendrua te rënia demografike, e cila po riformëson rajone të tëra dhe po krijon një “dimër demografik” që kërcënon të ardhmen e Evropës. Në fjalën e tij, Rama nënvizoi gjithashtu pozicionin e Ballkanit Perëndimor, i cili ndodhet në zemër të Evropës, por shpesh mbetet i përjashtuar nga politikat kryesore evropiane.