Ministri i Punëve të Brendshme të Maqedonisë së Veriut, Pançe Toshkovski, theksoi rëndësinë e bashkëpunimit dhe mbështetjes konkrete në menaxhimin e migracionit gjatë Takimit të Përfaqësuesve të Lartë në kuadër të Procesit të Pragës, që u zhvillua në Shkup. Ai vuri në dukje se migracioni është një realitet i prekshëm në kufijtë dhe komunitetet e rajonit, dhe se përballja me këtë sfidë kërkon investime në burimet njerëzore, modernizim të infrastrukturës kufitare dhe koordinim të ngushtë me vendet fqinje dhe agjencitë evropiane. Ministri nënvizoi se zbatimi i Paktit të ri të Bashkimit Evropian për migracionin dhe azilin është i mundur vetëm përmes përfshirjes aktive të vendeve të Ballkanit Perëndimor, për të shmangur mbingarkesën e tyre dhe për të siguruar mbështetje financiare dhe operacionale të qëndrueshme. Gjatë takimit u diskutuan gjithashtu përgatitjet për Konferencën e Pestë Ministrore të Procesit të Pragës dhe Planin e ri të Veprimit 2028–2032, me fokus në masat konkrete për përballimin e sfidave migratore dhe forcimin e menaxhimit kufitar në rajon.