Kleriku katolik shqiptar Shan Zefi ka reaguar pas raportimeve që i atribuonin atij deklaratën se “si mysliman nuk ke shpirt shqiptar”, duke e quajtur këtë një shtrembërim dhe manipulim të fjalëve të tij. Në një postim në Facebook, ai mohon kategorikisht se ka thënë diçka të tillë dhe thekson se gjatë intervistës për radion gjermane Deutschlandfunk ka mbrojtur identitetin dhe traditën shqiptare si një vlerë historike, kulturore dhe shpirtërore që duhet ruajtur nga ndikimet e huaja. Zefi paralajmëron se do të ndjekë rrugët ligjore për të zbardhur të vërtetën dhe kërkon që ata që kanë përhapur interpretimet e pavërteta të ndalojnë manipulimin dhe të kërkojnë falje publike për dëmin e shkaktuar. Ai thekson gjithashtu se gjatë gjithë jetës së tij ka punuar për ruajtjen e identitetit kombëtar dhe bashkëjetesën ndërfetare, duke dënuar çdo përpjekje për përçarje ndërfetare dhe dëmtim të figurës së tij publike.