Qyteti i Shkupit së bashku me dhjetë komuna të tjera në Maqedoninë e Veriut kanë përfituar 49 automjete të reja komunale për mirëmbajtjen e pastërtisë publike. Këto mjete përfshijnë 19 kamionë shumëfunksionalë, nëntë autocisterna dhe 21 automjete për pastrimin e rrugëve, të financuara me 4.2 milionë euro nga Banka Botërore. Promovimi i automjeteve u zhvillua në Shkup me praninë e kryeministrit Hristijan Mickoski, zëvendëskryeministrit dhe ministrit të Transportit Aleksandar Nikolloski, si dhe kryetarëve të komunave dhe përfaqësuesve të Bankës Botërore. Kryeministri theksoi rëndësinë e përgjegjësisë sociale dhe qytetare për ruajtjen e mjedisit, ndërsa kryetari i Bashkisë së Shkupit njoftoi se së shpejti do të promovohen edhe pesë kamionë të tjerë dhe po përfundojnë procedurat për blerjen e 3.200 kontejnerëve të rinj.