Shtetasit e huaj që udhëtojnë me automjete me targa të huaja në Maqedoni tani mund të kontrollojnë dhe paguajnë gjobat e trafikut në mënyrë elektronike përmes aplikacionit “Safe City”. Zëvendësministri i Punëve të Brendshme, Astrit Iseni, ka njoftuar se ky shërbim i dedikohet fillimisht drejtuesve të automjeteve me targa të huaja dhe u mundëson atyre të shohin kundërvajtjet, të kenë qasje në urdhërpagesat dhe të kryejnë pagesat online. Për t’u regjistruar, shoferët duhet të skanojnë dokumentin e udhëtimit dhe të fusin targën e automjetit që përdorin në Maqedoni, duke eliminuar nevojën për ndalime apo vonesa në pikat kufitare. Ky hap është pjesë e procesit të digjitalizimit të shërbimeve të sistemit “Safe City”, ndërsa në të ardhmen pritet që aplikacioni të zgjerohet edhe për kategori të tjera përdoruesish.