Kryetari i Kuvendit të Shqipërisë, Niko Peleshi, zhvilloi një takim me bashkëraportuesit e Asamblesë Parlamentare të Këshillit të Europës, Ionut-Marian Stroe dhe Pavel Jablonski, ku u diskutua mbi ecurinë e reformave dhe standardet demokratike në vend. Pas daljes nga sistemi i monitorimit në prill 2024, Shqipëria ka bërë përparime të dukshme në zbatimin e rekomandimeve të KiE, sidomos në luftën kundër korrupsionit, lirinë e medias, respektimin e të drejtave të pakicave kombëtare, reformën në drejtësi dhe forcimin e pavarësisë së institucioneve. Peleshi gjithashtu informoi raportuesit mbi veprimtarinë e komisioneve të posaçme për reformën zgjedhore dhe atë administrativo-territoriale, duke theksuar rëndësinë e këtyre proceseve për konsolidimin e institucioneve demokratike. Bashkëpunimi me Këshillin e Europës dhe Asamblenë Parlamentare të saj u vlerësua si një partneritet kyç në rrugëtimin e Shqipërisë drejt anëtarësimit në Bashkimin Evropian.