Shqipëria ka depozituar pranë Qeverisë së Shteteve të Bashkuara të Amerikës Instrumentin e Ratifikimit të Marrëveshjes për pranimin e saj në Kartën e Bordit të Paqes. Ky akt formal tregon përmbylljen e procedurave kushtetuese në vend dhe i jep fuqi të plotë juridike angazhimit të Shqipërisë në këtë iniciativë ndërkombëtare. Dokumenti është nënshkruar nga Ministrja për Evropën dhe Punët e Jashtme, Elisa Spiropali, dhe përfaqëson një moment të rëndësishëm në thellimin e rolit të Shqipërisë në promovimin e paqes, stabilitetit dhe bashkëpunimit ndërkombëtar. Autoritetet shqiptare theksojnë se ky hap forcon partneritetin strategjik me SHBA-të dhe angazhimin në arkitekturën euroatlantike të sigurisë.