Sot në Bruksel zhvillohet Konferenca e 8-të Ndërqeveritare mes Shqipërisë dhe Bashkimit Evropian, një takim kyç për avancimin e procesit të negociatave të anëtarësimit. Fokusi kryesor është grupkapitulli 1 “Themeloret”, që përfshin çështje të rëndësishme si gjyqësori, të drejtat themelore, reforma në administratë dhe kontrolli financiar. Konferenca do të përcaktojë përmbushjen e piketave ndërmjetëse nga Shqipëria dhe do të vendosë kushtet për fazën e ardhshme të negociatave. Takimi zhvillohet në margjinat e Këshillit të Çështjeve të Përgjithshme të BE-së dhe pritet të përfundojë me një konferencë për shtyp, ku do të jepen detaje mbi rezultatet e arritura.