Ministri i Punëve të Brendshme të Shqipërisë, Besfort Lamallari, zhvilloi një takim në selinë e Europol në Hagë me drejtues të agjencisë dhe përfaqësues të qendrave kundër krimit të organizuar dhe ekonomik. Gjatë bisedimeve u theksua rëndësia e forcimit të bashkëpunimit mes Shqipërisë dhe Europol në luftën kundër trafikut të drogës, grupeve kriminale, trafikimit të qenieve njerëzore, krimit financiar dhe mashtrimeve online. Lamallari vlerësoi partneritetin e ngushtë mes Policisë së Shtetit dhe Europol, duke theksuar rezultatet konkrete të operacioneve të përbashkëta dhe kontributin e Shqipërisë në sigurinë europiane në kuadër të procesit të integrimit. Në përfundim u riafirmua angazhimi për intensifikimin e shkëmbimit të informacionit dhe koordinimit operacional për të çuar bashkëpunimin në një nivel më të lartë dhe për të goditur më efektivisht krimin e organizuar në të gjitha format e tij.