Në Pentagon u zhvilluan konsultime dypalëshe në fushën e mbrojtjes mes delegacioneve të Shqipërisë dhe Shteteve të Bashkuara të Amerikës, me fokus thellimin e bashkëpunimit strategjik dhe çështjet e sigurisë. Delegacioni shqiptar u udhëhoq nga ministri i Mbrojtjes, Ermal Nufi, ndërsa pala amerikane nga Alton Buland, Zëvendësndihmës i Sekretarit të Mbrojtjes për Politikat Evropiane dhe NATO-n. Gjatë takimeve u diskutua zgjerimi i bashkëpunimit në sektorin e mbrojtjes, sfidat aktuale të sigurisë dhe angazhimet e përbashkëta në kuadër të aleancës euroatlantike. Pas takimeve, ministri Nufi theksoi vendosmërinë për të vazhduar përpjekjet për forcimin e partneritetit strategjik në të gjitha dimensionet dhe shprehu mirënjohje për mbështetjen e SHBA-së ndaj integrimit euroatlantik të Shqipërisë dhe stabilitetit në Ballkanin Perëndimor.