Në vitin 2024, Shqipëria u rendit e teta në Europë për numrin e lartë të vrasjeve me dashje në raport me popullsinë, me 41 raste të regjistruara dhe një normë prej 1.71 vrasje për 100 mijë banorë. Kjo shifër përbën një rritje të ndjeshme krahasuar me vitin 2023, kur niveli ishte 1.27, për shkak të rritjes së numrit të vrasjeve dhe zvogëlimit të popullsisë sipas Censusit të ri. Në Europë, megjithëse numri i vrasjeve me dashje ka pasur luhatje gjatë dekadës së fundit, në vitin 2024 u shënua një rritje e lehtë prej 1% krahasuar me vitin 2023, duke mbetur megjithatë më i ulët se kulmi i vitit 2015. Faktorët që ndikojnë në nivelet e larta të vrasjeve në Shqipëri dhe vende të tjera të Ballkanit lidhen me konflikte personale, gjakmarrje, qarkullimin e armëve dhe ndikimin e krimit të organizuar, ndërsa në vendet baltike dhe Finlandë ndikojnë faktorë historikë, socialë dhe përdorimi i alkoolit.