Gjatë 24 orëve të fundit në Shqipëri janë regjistruar 33 vatra zjarri, prej të cilave 8 vijojnë të jenë aktive dhe 5 të tjera janë nën monitorim. Për të përballuar këtë situatë emergjente janë angazhuar 535 forca operacionale dhe 51 automjete zjarrfikëse, duke përfshirë edhe Forcat e Armatosura me efektivë, helikopterë dhe avionë Air Tractor. Ndërhyrjet më intensive po zhvillohen në zonat e Malit të Dajtit, Gurë-Lurë të Dibrës dhe Lufaj të Mirditës, ku ekipet po përdorin korridore ndarëse për të ndaluar përhapjen e flakëve. Situata mbetet sfiduese, ndërsa forcat në terren vazhdojnë përpjekjet për të kontrolluar zjarrin dhe për të parandaluar dëme më të mëdha.