Një raport i Komisionit Europian tregon se 17% e punonjësve shqiptarë ndihen gjithmonë ose shumicën e kohës emocionalisht të lodhur nga puna, një nivel mbi mesataren e Bashkimit Europian prej 13%. Në rajon, rekordin e mban Kosova me 29%, duke u renditur e dyta në Europë pas Qipros. Ndërsa Shqipëria ka një nivel relativisht të ulët të lodhjes fizike në punë, me 26%, vendet e tjera të rajonit si Mali i Zi dhe Maqedonia e Veriut shfaqin përqindje më të larta. Gratë dhe punonjësit në sektorë si arsimi dhe shëndetësia raportojnë më shpesh rraskapitje emocionale, ndërsa dhimbjet muskulare dhe ankthi janë shqetësime të përhapura mes punonjësve në Europë. Anketa e zhvilluar në 35 vende dhe mbi 36,000 intervista ofron një pasqyrë të detajuar mbi cilësinë e punës dhe sfidat emocionale që përballen punonjësit në kontinent.