Të paktën pesë vende anëtare të Bashkimit Evropian, përfshirë Holandën, Estoninë, Letoninë, Lituaninë dhe Suedinë, po bllokojnë hapjen e Klasterit 3 në negociatat e anëtarësimit të Serbisë në BE. Kjo situatë është e paprecedentë dhe konsiderohet një sinjal alarmi për procesin e integrimit evropian të Serbisë, ku regjimi i presidentit Aleksandar Vuçiq akuzohet për korrupsion, shkelje të të drejtave të njeriut dhe kufizim të lirisë së shprehjes. Një nga arsyet kryesore të bllokadës është mungesa e sanksioneve të Serbisë ndaj Rusisë për shkak të pushtimit të Ukrainës, si dhe përkeqësimi i situatës në fushën e sundimit të ligjit. Komisioni Evropian kishte vlerësuar në vitin 2021 se kushtet për hapjen e këtij klasteri ishin përmbushur, por për shkak të kundërshtimeve të disa shteteve anëtare, procesi është pezulluar, duke vënë në pikëpyetje përparimin e Serbisë drejt Bashkimit Evropian.