Delegacioni i Bashkimit Evropian në Maqedoninë e Veriut ka bërë të ditur se sistemi Evropian i Hyrjeve-Daljeve (EES), i cili zbatohet në të gjitha vendet pjesëmarrëse të zonës Shengen, nuk parashikon vonesa apo përjashtime të përgjithshme për qytetarët e vendeve të treta. Megjithatë, shtetet anëtare kanë mundësi të aplikojnë fleksibilitet të përkohshëm në pika të caktuara kufitare në raste të jashtëzakonshme dhe për periudha të kufizuara kohore. Komisioni Evropian dhe Delegacioni i BE-së në Maqedoninë e Veriut monitorojnë nga afër zbatimin e sistemit dhe mbajnë kontakte të ngushta me shtetet anëtare për të siguruar një proces të rregullt. Ministri i Punëve të Jashtme të Maqedonisë së Veriut, Timço Mucunski, ka mohuar informacionet për përjashtime individuale dhe ka theksuar se po zhvillohen diskutime në nivele të larta për të siguruar fleksibilitet në zbatimin e EES për vendet e rajonit.