Dosja prej 247 faqesh e Sigurimit të Shtetit shqiptar tregon se aktiviteti ndaj Sabri Novosellës u intensifikua pasi ai u vendos në Suedi, ku shërbimi ndërmori masa operative dhe agjenturore për ta ndjekur dhe penguar veprimtarinë e tij në emigracion. Në dokumente përmendet një plan operativ për identifikimin dhe parandalimin e veprimtarisë që konsiderohej armiqësore, si dhe survejimi i tij në vende të ndryshme jashtë Shqipërisë. Dosja përmban edhe shqyrtimin e mundësisë për dërgimin e letrave anonime kërcënuese me qëllim që Novosella të heqë dorë nga aktiviteti i tij. Nga rrëfimi i vetë Novosellës del se marrëdhëniet me diplomatët shqiptarë, veçanërisht me Bujar Hoxhën, ishin në fillim të mira, por më pas u prishën, sidomos pas arrestimit të vëllait të tij në vitin 1989.