Kryetari i LSDM-së, Venko Filipçe, deklaroi se për shkak të politikave të kryeministrit Hristian Mickoski, Maqedonia është larguar nga agjenda evropiane dhe mbetet jashtë proceseve integruese që po zhvillohen në rajon dhe Evropë. Ai theksoi se kjo situatë po e izolon politikisht vendin dhe rrezikon dështimin ekonomik, duke e lënë Maqedoninë të fundit në rajon. Filipçe kritikoi gjithashtu ndryshimet e propozuara në Kodin zgjedhor, sidomos ato që lidhen me votimin e diasporës, të cilat sipas tij mund të minojnë legjitimitetin e zgjedhjeve të ardhshme. Ai kërkoi që çdo ndryshim në mënyrën e votimit të bazohet në analiza serioze dhe përvojat ndërkombëtare, duke vënë në dukje mungesën e interesit të qeverisë për përmirësimin e sektorëve si shëndetësia, arsimi dhe bujqësia.