Ish-prokurori kryesor në gjyqin kundër Slobodan Millosheviqit, Sir Geoffrey Nice, ka vizituar Memorialin Përkujtimor në Reçak, i shoqëruar nga ish-komandanti i Zonës së Nerodimes, Shukri Buja, dhe avokati Taulant Hodaj. Gjatë vizitës, ata u takuan me banorë dhe të mbijetuar të masakrës, duke vizituar kompleksin memorial dhe vendet ku u morën jetë të pafajshme, duke shprehur respekt dhe përgjegjësi për historinë e rëndë të këtij vendi. Shukri Buja theksoi rëndësinë morale dhe historike të pranisë së Sir Geoffrey Nice në Reçak, duke e cilësuar atë simbol të drejtësisë ndërkombëtare dhe njeri me guxim dhe integritet që udhëhoqi ndjekjen penale kundër regjimit të Millosheviqit. Ai shprehu mirënjohje të thellë për kontributin e Nice në mbrojtjen e së vërtetës dhe drejtësisë, duke e konsideruar vizitën një nder të madh dhe një garanci që drejtësia dhe e vërteta nuk do të harrohen.