Komuna Qendër e Shkupit ka prezantuar një sistem të ri parkimi me qëllim të shpërndarjes më të drejtë të hapësirës publike dhe reduktimit të kaosit në komunikacion në zonën qendrore. Sipas rregullave të reja, kartelat preferenciale nuk do të jepen më për person, por për njësi banimi, duke kufizuar kështu numrin e automjeteve me privilegje në një adresë. Automjeti i parë do të parkojë falas, ndërsa për të dytin dhe të tretin do të paguhen tarifa mujore përkatësisht 500 dhe 1.500 denarë. Ky sistem synon përdorim më racional të hapësirës, veçanërisht në lagjet me mungesë të vendeve për parkim si Debar Maallo, Kapishtec dhe Bunjakovec.