Ministria e Punëve të Brendshme e Maqedonisë njofton se sistemi i kontrolleve të përbashkëta kufitare "One Stop" tashmë funksionon në pikat me Serbinë dhe Kosovën, duke ulur ndjeshëm kohën e pritjes edhe në periudhën me fluks të lartë të udhëtarëve. Me nënshkrimin e marrëveshjes me Shqipërinë, ky sistem do të vendoset së shpejti edhe në këtë kufi, duke e bërë Maqedoninë një nga vendet e para në rajon me këtë model të avancuar të menaxhimit kufitar. Ky projekt nuk është vetëm një përmirësim administrativ, por një investim strategjik që rrit bashkëpunimin ekonomik, turizmin dhe sigurinë në rajon, duke lehtësuar lëvizjen e qytetarëve dhe përmirësuar komunikimin mes vendeve fqinje jashtë zonës Shengen. MPB thekson se kjo iniciativë është pjesë e përpjekjeve për të krijuar një ministri moderne, që implementon zgjidhje evropiane për të përmirësuar jetën e përditshme dhe konkurrueshmërinë e Maqedonisë.