Mbyllja e sallave të operacionit dhe të lindjes në Spitalin e Përgjithshëm të Gostivarit, për shkak të ndotjes së ujit, ka shkaktuar një fluks të madh pacientësh në Spitalin Klinik të Tetovës. Që nga mesi i korrikut, mbi 200 pacientë nga Gostivari janë trajtuar në Tetovë, me numrin më të madh në repartin e gjinekologjisë, kryesisht për lindje me prerje cezariane. Përveç kësaj, janë rritur ndjeshëm edhe ndërhyrjet dhe kontrollet në repartet e urologjisë, kirurgjisë abdominale dhe ortopedisë. Drejtuesit e Spitalit të Tetovës sigurojnë se kanë kapacitete të mjaftueshme për të përballuar këtë situatë, ndërsa sallat e operacionit në Gostivar do të qëndrojnë të bllokuara deri në konfirmimin e sigurisë së ujit të pijshëm.