Fehim Sali, i arrestuar në Kosovë me dyshimin për spiunazh, është përfshirë në një skemë të organizuar nga Agjencia e Sigurisë dhe Informacionit të Serbisë (BIA) për të siguruar vota për presidentin Aleksandër Vuçiq dhe partinë e tij SNS në zgjedhjet parlamentare të vitit 2024. Nga përgjimet e siguruara, Sali i ka ofruar BIA-s informacione të detajuara për regjistrimin e votuesve nga komuniteti goran në Kosovë dhe ka rekomanduar përdorimin e presionit dhe dhunës për të detyruar votimin pro-Vuçiq. Ai është themelues i OJQ-së “Moja Gora” dhe dyshohet se ka mbledhur nënshkrime dhe ka organizuar vota në mënyrë të paligjshme, ndërsa para arrestimit ishte aktiv në përgatitjen e materialeve zgjedhore dhe koordinimin me zyrtarë të BIA-s. Pas arrestimit të tij më 13 gusht, autoritetet kanë bastisur shtëpinë e tij dhe kanë sekuestruar prova, ndërsa ai ka pranuar para prokurorisë se është rekrutuar nga shërbimi serb i inteligjencës.