Studentët shqiptarë të Fakulteteve Juridike në Maqedoninë e Veriut kanë paralajmëruar një protestë të dytë, duke theksuar se nuk janë të kënaqur me mungesën e rezultateve pas protestës së parë më 6 prill në Shkup. Kërkesa kryesore e tyre mbetet dhënia e provimit të jurisprudencës në gjuhën shqipe, një të drejtë që ata e konsiderojnë elementare dhe të garantuar me ligj, por që institucionet nuk e kanë zbatuar ende. Pavarësisht premtimeve nga zyrtarë të ndryshëm, përfshirë zëvendëskryeministrin dhe kryetarët e komunave me përfaqësim shqiptar, nuk ka pasur hapa konkretë për zgjidhjen e çështjes. Mobilizimi i ri filloi nga Kumanova dhe pritet të përfshijë një koordinim më të madh dhe një qëndrim më të unifikuar të studentëve, të cilët theksojnë se kauza e tyre është përfaqësim me dinjitet dhe respekt i të drejtave të shqiptarëve në vend.