Delegacioni i organizatës “Albanians for America” (AFA), i udhëhequr nga Doc Vranici, zhvilloi një seri takimesh në Washington me senatorë, kongresmenë dhe zyrtarë të lartë amerikanë për të diskutuar çështjet shqiptare në Ballkanin Perëndimor dhe forcimin e mbështetjes për komunitetin shqiptaro-amerikan. Gjatë takimeve në Kongres, Senat dhe Departamentin e Shtetit, u trajtuan temat e sigurisë rajonale, ndikimi rus dhe kinez, si dhe rëndësia e partneritetit strategjik SHBA-vende shqiptare. Delegacioni kërkoi mbështetje për integrimin e Kosovës në NATO, vazhdimin e pranisë së forcave amerikane në KFOR dhe adresimin e shkeljeve të të drejtave të shqiptarëve në Luginën e Preshevës. Po ashtu, u diskutuan tensionet në Maqedoninë e Veriut dhe nevoja për zgjidhje demokratike, ndërsa u theksua rëndësia e ruajtjes së stabilitetit dhe përkrahjes për demokracinë në rajon.