Në Prizren u mbajt takimi trepalësh i Avokatëve të Popullit të Kosovës, Shqipërisë dhe Maqedonisë së Veriut, ku u diskutuan tema të rëndësishme për bashkëpunimin ndërinstitucional në trajtimin e çështjeve me element ndërkufitar. Gjatë sesionit të parë u përqendrua vëmendja në çështjet civile dhe familjare, mbrojtjen e të drejtave të fëmijëve dhe kategorive të cenueshme, si dhe në garantimin e proceseve ligjore për personat e privuar nga liria. Palët shqyrtuan gjithashtu mundësitë për veprime dhe iniciativa të përbashkëta në nivel rajonal, duke synuar forcimin e koordinimit dhe shkëmbimin e përvojave. Në përmbyllje të takimit u nënshkrua Memorandumi i Bashkëpunimit, ndërsa përfaqësuesit e tri institucioneve dhanë një deklaratë të përbashkët për media.