Komandanti i KFOR-it, gjeneralmajor Özkan Ulutaş, u takua në Beograd me shefin e shtabit të përgjithshëm të forcave të armatosura serbe, gjeneral Milan Mojsilović, në një takim që ishte pjesë e komunikimeve të rregullta dhe transparente mes dy palëve. Gjatë takimit u diskutuan tema të ndryshme me interes të përbashkët, me fokus në bashkëpunimin për zhvillimet e sigurisë dhe ruajtjen e stabilitetit rajonal. Gjeneralmajor Ulutaş falënderoi mikpritjen dhe përshëndeti njoftimin për një stërvitje të përbashkët NATO-Serbi që do të mbahet në maj në Serbi, ku KFOR-i nuk do të ketë rol dhe që do të zhvillohet në respekt të politikës së neutralitetit ushtarak të Serbisë. KFOR-i vazhdon të zbatojë mandatin e tij sipas Rezolutës 1244 të OKB-së, duke kontribuar në një mjedis të sigurt dhe të qetë në Kosovë në koordinim me Policinë e Kosovës dhe EULEX-in.