Komandanti i KFOR, gjeneralmajor Ozkan Ulutas, priti në selinë e misionit në kampin Film City në Prishtinë kongresistët amerikanë Keith Self dhe Suhas Subramanyam. Gjatë takimit, ai përshkroi situatën e sigurisë në rajon dhe theksoi angazhimin e vazhdueshëm të KFOR-it për të siguruar një ambient të sigurt për të gjithë banorët e Kosovës. Gjeneralmajor Ulutas shprehu gjithashtu falënderime për kontributin e gjatë dhe të vlefshëm të Shteteve të Bashkuara në misionin e udhëhequr nga NATO. KFOR-i vazhdon të zbatojë mandatin e tij sipas Rezolutës 1244 të OKB-së, duke punuar ngushtë me Policinë e Kosovës dhe EULEX-in për të garantuar sigurinë dhe lirinë e lëvizjes në mënyrë të paanshme.