Ministri i Mbrojtjes, Ejup Maqedonci, priti anëtarët e Komitetit Ushtarak të NATO-s dhe kryetarin e Komitetit Ushtarak të Bashkimit Evropian për të diskutuar zhvillimet aktuale të sigurisë dhe rolin e Kosovës në stabilitetin rajonal dhe global. Gjatë takimit u theksua synimi strategjik i Kosovës për anëtarësim në Bashkimin Evropian dhe NATO, si një hap kyç për zhvillimin dhe forcimin e sigurisë në rajon. Ministri informoi delegacionin për objektivat e Ministrisë së Mbrojtjes për katër vitet e ardhshme, duke përfshirë zhvillimin e kapaciteteve të Forcës së Sigurisë së Kosovës, mbrojtjen gjithëpërfshirëse, industrinë e mbrojtjes dhe bashkëpunimin ndërkombëtar. Ai nënvizoi se anëtarësimi në strukturat euroatlantike është i domosdoshëm për paqe të qëndrueshme dhe bashkëpunim të thelluar ndërkombëtar, duke e cilësuar Kosovën si një partner të besueshëm në sigurinë kolektive.