Kryeministri Hristijan Mickoski theksoi se Kushtetuta e Maqedonisë garanton mbrojtje serioze për të drejtat e të gjitha komuniteteve, përfshirë edhe bullgarët në vend. Ai nënvizoi se kjo mbështetet edhe nga Këshilli i Evropës, i cili ka ndërprerë misionin e monitorimit për të drejtat e njeriut në Maqedoni. Megjithatë, Mickoski ngriti shqetësimin për situatën e komunitetit maqedonas në Bullgari, ku sipas tij, autoritetet vazhdojnë të shmangin regjistrimin e shoqatave maqedonase, pavarësisht vendimeve të Gjykatës së të Drejtave të Njeriut në Strasburg. Ai deklaroi gatishmërinë për bisedime të sinqerta dhe efektive me palën bullgare, duke theksuar nevojën për përpjekje diplomatike që të afrojnë pozicionet e të dyja vendeve.