Mëngjesin e së martës, hyrja kryesore e kantierit të Aeroportit të Vlorës u bllokua nga kamionë të kompanisë 2A Group, duke penguar hyrjen e nënkontraktorëve të kompanisë MABCO dhe duke ndaluar vijimin e punimeve. Përplasjet mes punonjësve të MABCO-s dhe përfaqësuesve të 2A Group shkaktuan tensione dhe situata mbeti e bllokuar, ndërsa konflikti mes palëve vazhdon të ndikojë në ecurinë e projektit. Në vendngjarje ishin të pranishme forca të Policisë së Shtetit për të monitoruar situatën dhe për të parandaluar përshkallëzimin e konfliktit, i cili lidhet me mosmarrëveshjet mes aksionerëve të përfshirë në ndërtimin e aeroportit. Ky bllokim ka krijuar vështirësi në vijimin normal të punimeve dhe ngre shqetësime për afatet e përfundimit të një prej projekteve më të rëndësishme infrastrukturore në jug të vendit.