Protesta e opozitës në Tiranë, e zhvilluar për 90 minuta këtë të premte, u shoqërua me tensione dhe përplasje mes protestuesve dhe policisë. Marshimi filloi drejt Ministrisë së Brendshme, por nuk arriti destinacionin e parashikuar pasi policia krijoi një kordon për të ndaluar protestuesit. Kjo situatë shkaktoi hedhje molotovi dhe fishekzjarrësh nga ana e protestuesve, ndërsa policia iu përgjigj me gaz lotsjellës dhe ujë. Pavarësisht tentativave për të çarë kordonin, protestuesit nuk arritën qëllimin dhe pak para përfundimit të orarit zyrtar, u drejtuan drejt selisë së Partisë Demokratike, ku protesta u shpall e mbyllur. Tre persona u shoqëruan nga policia gjatë ngjarjeve.