Më shumë se një vit pas nënshkrimit të marrëveshjes për bashkëpunim në fushën e mbrojtjes mes Kosovës, Shqipërisë dhe Kroacisë, Serbia e sheh këtë si një kërcënim të drejtpërdrejtë për integritetin e saj territorial dhe sigurinë kombëtare. Presidenti Aleksandar Vuçiq ka deklaruar se këto vende po përgatiten për sulm dhe ka paralajmëruar rritje të investimeve në ushtri dhe blerje të armatimit, duke përfshirë raketa balistike supersonike nga Kina. Ekspertët e sigurisë vlerësojnë se kjo retorikë ka më shumë motive politike dhe shërben për të mobilizuar mbështetjen e brendshme në Serbi, duke krijuar imazhin e një vendi “nën rrethim” dhe duke justifikuar bashkëpunimin me Rusinë dhe Kinën.