Deputeti Halil Snopçe nga Aleanca për Shqiptarët kritikoi ashpër qeverinë dhe kryeministrin Hristijan Mickoski gjatë një seance parlamentare, duke akuzuar për rritjen e tensioneve dhe polarizimeve në shoqëri. Ai theksoi mungesën e besimit të të rinjve ndaj kryeministrit, duke lidhur këtë me sjelljet dhe qëndrimet e tij, si dhe me mungesën e përgjigjeve për arsyet e protestave studentore. Snopçe ngriti shqetësime për ndikimet e jashtme, duke përmendur rritjen e ndikimit rus, kinez dhe “botës serbe” në vend, si dhe për kalimin e tonelatave marihuanë pa reagim adekuat nga institucionet. Ai gjithashtu kritikoi ndryshimet e papritura në qëndrimet e kryeministrit lidhur me mbajtjen e provimit të jurisprudencës në gjuhën shqipe, duke theksuar se këto veprime dobësojnë besimin e të rinjve dhe kontribuojnë në tensionet e brendshme.