Organizata VLEN ka akuzuar BDI-në për mbrojtje të mafias urbane në Tetovë, duke theksuar se gjatë qeverisjes së saj ishin uzurpuar prona publike dhe qyteti ishte zhytur në borxhe dhe kaos. Me ardhjen në krye të komunës të Bilall Kasamit, sipas VLEN-it, situata ka ndryshuar rrënjësisht: prona publike janë kthyer tek qytetarët, po ndërtohen stadiumi, rrugë, bulevarde dhe dy shkolla të mesme, si dhe janë përmirësuar infrastruktura e ujit të pijshëm dhe kanalizimi. VLEN thekson se këto zhvillime po pengohen nga BDI-ja, e cila sipas tyre ka nostalgji për periudhën kur komuna ishte në krizë dhe borxhe. Fitorja e thellë e VLEN-it në zgjedhjet lokale shihet si mesazh i qartë për mbylljen e kapitullit të korrupsionit dhe degradimit në Tetovë, duke hapur rrugën për zhvillim dhe mirëqenie.